新春桂林夜市 街坊有野講:[識做]是小販特性 建制政府請勿抹黑 政團請勿幫倒忙

轉載自 [草根.行動.媒體]

photo168342759746415005
今年周街都是食環人員和充公車

photo205190911971404266

文:深水師奶

作為一個深水埗桂林街一帶住左十幾年的師奶仔,對於今年無桂林夜市,真係好失望。

早個月就在網上見到民賤聯聲稱好多街坊唔鐘意新年有人擺賣,話污糟又有黑社會,就話今年要求食環嚴打。然後,又有各方蠢蠢欲動的政治團體,又有人去區議會示威,又有人搞記招,又有人話初一下午4-6擺檔明搞對抗,又有人話要幫啲小販搞好衛生和交通問題,叫食環唔好搞佢地咁話。各式其色,牌頭多到不得了,我都分唔清邊個打邊個啦。

小販係基層揾食方法之一,新年三日都唔通融下真係好無人情味,呢啲我梗係認同啦。有人出嚟搞下野撐下基層梗係好事,之但係果啲團體講咩呢?我好驚驚地發覺,點解有啲團體,雖然撐小販,但論調竟然同民賤聯無分別,都係話小販構成嚴重安全和衛生問題?佢地其實有無落區了解過情況,對小販的運作又有幾熟悉?

 

首先,[額外]的衛生問題?
有團體聲稱要來[協助小販處理衛生問題],其實我睇唔出有咩特別的衛生問題。即係唔係話無所謂[額外的垃圾],只不過平時嚟講,根本果一帶都好多小食店,垃圾筒迫爆、周地醬汁是常有之事。咁依呢個邏輯係咪要唔俾人係到開小食店?咁民賤聯又唔敢。咁即係所謂的額外垃圾,根本只是針對沒有資本開舖頭的小販啦。況且,所謂額外的垃圾,以我所見,主要不是小販的垃圾,而是消費者的食物袋/殘渣/跌落地上的食物等無處理好。

不過,作為桂林一帶的街坊 我親眼見到其實之前幾年食環署有放置大型的垃圾筒同垃圾袋,只要放多幾個就已能處理大量垃圾,不過都係有消費者唔乖的問題架啦。但經過一晚清潔工友的清理第二朝去拜年根本見乜春都見唔到。

當然, 如果有人話,明白到食環署的清潔工友辛苦,又外判又低薪仲成日俾人拖糧,因而想新年回饋下基層,幫下清潔工清理下都無話唔好。係,啲團體咁強調衛生問題, 即係認同了民話夜市特別污糟的說法啫作為街坊的我就覺得有誇大之嫌。

如果話係想擺個姿態攞大眾認同這些團體的想法的話,咁為左攞大眾認同而講啲與事實不符的野去過度屈左啲小販,又係咪問題呢?

 

第二,安全
啲團體又話,要規劃出小販區和行車線免得車人爭路唔安全喎。

其實,小販都係想揾食啫,都唔想出事搞到無得揾,所以,咁多年嚟,佢地都係擺埋路邊,一向都會有條車路俾車行。識做根本就是在縫隙生活的小販的特性,呢啲野,根本無須外人來做任何規劃。

就算平時要在福榮街/桂林街轉出元州街的車都不會行快車 因為大家都知果到好多人,成日有車落貨而且,係人都知新年呢頭係夜市,識野的車都唔會駛入嚟,駛得入嚟預左塞少少,新年流流,大家都會自動調較。呢啲野,好自然啫。大家唔好好學唔學,學埋香港政府事事都要管理的態度,否認哂小市民互相協調的空間喎。

車路嚟講,平時桂林夜市主要集中在福榮/福華之間一段桂林街以及十字路口小小位。如果有車需要轉入元州街大路,隔個街口就有南昌街可選擇,在福榮街入桂林街轉上一條就係元州街,果段桂林街通常並非夜市範圍。同時,新年的晚上根本不會好多好多車,所謂交通問題,根本多餘,揾野嚟講。

民間團體有咁樣的建議根本等於認同民聯話小販就一定係不自律。我唔係想話小販個個好有公德心好自律,而係想話呢種自律有好功利的原因,就係[揾食要識做],故所謂規劃小販區和車路根本沒有必要。

 

小小感想:
講真,我都知有啲呢頭的業主成日嫌深水埗窮,搞到佢層樓無得升值。相信民賤聯都係群埋呢類業主,嚟搞呢單打壓小販。但選舉現實就係,不一定住係到的業主,好可能有選票;但日日係到生活的基層租戶和小販,就好可能無選票。呢單打壓熟食小販,好明顯就係香港啲有產階級欺壓基層啫。

最後,如上所述,如我呢十幾年的觀察,民賤聯對桂林夜市小販的指控係咪要接受為全部事實都成疑問,咁點解反而要就住民賤聯的分析和口味,來聲稱由民間對小販進行規管?咁會唔會反而變成為插旗而屈左小販?

昨夜某團體在黃金外插旗搞論壇,成絛街無小販出來接受佢地的民間規管,食環車和人員就一堆。企左一陣聽果兩位係到插旗的後生講野,講兩句就重覆話政府偏幫大陸人,欺負香港人,好似鬧大陸人就係萬能key可以解決所有問題咁。關心下基層哽係好,民間自己規劃亦係好主意,但係好多民生事務唔係咁簡單架,如果係為街坊好的,就真係要了解多啲事實層面的問題囉。

即係個問題可以咁問,個矛盾仲明顯啦:點解有錢租舖的熟食檔,佢地啲消費者搞污糟啲地方,就無人因此要取締舖頭;相反,無錢租舖的熟食小販,只不過新年擺三日,佢地啲消費者搞污糟啲地方,就入哂小販數,仲咁惡話要取締?
仲唔係迫小商販交貴租的地產霸權意識作怪?

photo205190911971404267(1)

延伸閱讀:

「最自由經濟體」的雙重標準: http://www.inmediahk.net/node/1020708

那夜凌晨,我在深水埗桂林夜市… http://dicky828.blogspot.hk/2014/02/httpswww.html

(本文作者另一文章: [豆腐主義]連鎖店以本傷人,欺人太甚!

廣告

發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s

%d 位部落客按了讚: