天水圍街坊的趁墟見聞

[轉載自: 草根‧行動‧媒體]

按:天水圍街坊小吉,放假同媽媽去趁墟。媽媽一路行一路好多諗法,以下是她的見聞。

天水圍街坊的趁墟見聞
筆錄及整理:小吉

大台

2

話就話住天水圍,但天水圍都唔細,真係未必處處去過。阿女聽朋友介紹,同我一齊去天悅邨露天廣場個生活墟 註一。沿途唔少熱心街坊主動教路,都唔難搵。我仲知多咗天水圍都有幾多俾街坊聚腳的社區中心,唔使下下行商場咁悶。

去到見到中間主台,有義工講解為咩搞呢個活動,旁邊有好多攤位。我記得街坊義工好熱情,只要我幫手疊三份社區報,就可以換到義工煲嘅涼茶;我幫忙入1000克米落個膠袋,就得到3分「基保券」註二-可以唔使錢,在現場換到其他街坊唔需要的二手物品。

3

4

(街坊以勞動或提供二手物賺取基保券,並以基保券換取所需二手物。)

我記得有攤位講種菜、種草藥;又有攤位招募社區內的街坊加入買餸煮飯,俾有需要的人食,一齊傾下可以點做。呢個「社區廚房」諗法幾好,我希望「食物要平、靚、正」,「少肉多菜,食得開心又健康」,仲寫低咗個想法貼出嚟。義工好熱情,但問我就未必會參與。因為我對腳唔好,喺屋企煮飯都唔可以企太耐,同埋而家佢地連廚房空間都未有,我都唔係好知要傾咩。

5

6

見到有義工教整有機肥料,我以前都試過整,不過唔知邊度出問題,搞到好臭,整唔成。今日聽義工講,就知多咗整有機肥料要注意啲咩,從中得益不少。另外知道下牙粉(成份天然,不像牙膏含有害化學物質)點樣整、水入面都種到有機菜[小吉納悶:街坊自主生產食物的出發點很好,不過將來會否正中政府下懷,大力推行水耕種植,繼而更輕視土地對農業發展的重要?這點仍未想得通];仲有最深刻係有義工諗到,把遮爛咗,可以用塊布整環保袋,好有創意,又物盡其用。

我同幾個鄰居都鍾意種花。番到屋企,我會試下整環保酵素(天然清潔劑)同埋有機肥料,再同鄰居交流下。另外我都想了解多啲「基保券」。以前去趁墟只係買嘢,好少有人主動同我講下環保、唔傷害地球嘅諗法,今次都係一種新體驗。

註一:活動名為「民間交流會暨天水圍自主生活墟」,於2015315日舉行,由天水圍社區發展網絡舉辦,當日亦有數個區內伙伴團體參與 ,包括關注草根生活生活聯盟、天姿作圍、佛教慈濟基金會香港分會、香港善導會精神健康綜合社區中心朗澄坊及好家庭菜園。天水圍社區發展網絡長遠期望社區內的居民互相交流生活智慧,共同解決社區問題,創建永續自主的社區。

註二:摘自20152月《天水圍社區報》-「基保券」(又稱時分)是天水圍的社區貨幣。加入社區經濟計劃成為會員,付出自己的能力或專長,提供服務予其他會員,即可賺取時分。會員亦可利用時分參與各項活動,購買有機產品,交換日常所需物件,支持平等共享。

廣告

發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s

%d 位部落客按了讚: