轉載自 [草根．行動．媒體]
焦點:
財政預算案..點止派糖咁簡單?
2015 年 2 月尾,政府公佈新一年財政預算案,雖然早預料到不會太關心我們這些小市民,但也要知道有甚麼「大石」「碌緊落嚟」(壓下來)。我們花了些時間,做了個小總結。
全民養老,扮有下文
看新聞,政府在預算案中預留 500 億公帑,作為長者退休保障用。記得去年有民間團體、政府學者講「全民養老金」,好像一開始同樣是要 500 億。那麼政府是否要推行全民養老金?
我們變成老人時,是否可以不用審不用查,每月有一筆收入養老?
原來不是。
財爺鬍鬚曾在預算案,聲稱全民養老金這類計劃「隨付隨支」,怕難以維持,只是見好多人關心全民養老金,就話會預留 500 億日後做相關事情。
但明明民間團體和學者已推算過未來人口,計過數,民間全民養老金方案是可行兼不會爆煲,這些又唔見佢講?
那麼500 億用來做甚麼呢?沒有講。如何應付人口老化?無下文。
未來基金,有入無出
鬍鬚曾又重覆講「結構性財赤」,即十幾年後,政府收稅收錢會唔夠用,於是要適時儲錢。
其實政府近兩年請了一堆經濟學家、基金公司前高層等等,組成「長遠財政計劃工作小組」,由去年開始話要設未來基金。到了今年,小組有份新報告,很詳細建議政府用錢要有上限,如何儲錢云云。但這筆錢點用?邊個批准用?去年、今年的報告都無寫!
唔止小組無提及,其實連鬍鬚曾也都無詳細講,佢舉嘅例都係一些大工程,會唔會變成大白象工程?小市民如何監察?
香港未來,唔講你知
政府成日講人口老化,話不夠錢用,但到現在仍然從未講有乜計劃去解決人口老化問題,至今只話有「500 億」,無講點用。結構財赤問題只係有儲錢, 完全唔講錢點用、點批。
民間這幾年先後提出「全民養老金」、「社會投資」等。「全民養老金」用以解決人口老化問題,「社會投資」希望用錢搞人才培訓、教育、科技、環保、房屋等,令社會長遠健康發展,以縮短、避免財赤。
但政府聽完好似聽唔到咁,樣樣嘢講到唔清唔楚又扮做左,唔好當小市民易呃喎!
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
雜草攻略:
春夏養生平平食
文:心水師奶
打工仔女,劏房街坊,即使錢財不多,也可以照顧健康的。
人有五臟六腑,人的身體都是大自然的一部份,四季養生,隨住節氣不同,有不同的方法。
春天夏天,有咩方法,平平地又最幫助到健康呢?
家傳小知識,同大家分享下:
春天肝氣旺盛,相對要注意,脾胃的消化吸收功能可能受影響喎,所以呢,食物要以清淡為主,最好就係綠色的蔬菜以及少食酸嘢。如果工種是時常挨夜的工友好似保安清潔工咁,唯有多啲沖枸杞沖滾水飲,枸杞都唔算貴。另外春天腰頸背痛易發作,宜得閑就拉下筋,做下伸展運動啦。如果本身有過敏和氣喘的朋友,就要小心唔好貪爽,要少食生冷瓜果啦。
夏天要養心,宜吃紅色食物,如蕃茄、西瓜、蘋果等等。夏天暑熱,不可食辛辣油膩,不可[火上加油]。另外,夏天也不要貪涼常常坐在冷氣房,要適量出出汗,並且,出入冷氣地點,最好帶多件衫或者大毛巾都好,無咁易感冒。更加留意不要貪涼常飲凍飲,凍飲會令身體暑濕增加,易病。室温的水和生果最好。
如果有機會煲湯,也可煲消暑去濕的湯水,例如用冬瓜、葛根、蓮葉、冬瓜子、赤小豆、扁豆煲湯;亦可煲酸梅湯。在猛晒太陽後,芥菜滾湯能有效消暑散熱。
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
草根文藝:
你聽到了吧
有個街坊 叫美鳳 今年44歲
充滿怨對嘅眼神 經常回望過去
泛黄舊照中嘅少女 瀾漫笑容
記載一個夢 做個老師得所有人尊重
俗語有云 男大當婚 女大當嫁
阿媽話 女仔人家 當然嫁戶好人家
就係咁 不情不願下 咁就嫁左落黎
轉眼20後 老公中風 只好靠雙手發圍
但面對世界 頓覺無力 見工老細見佢面上皺紋叫佢返歸等消息
搵外家訴苦 外母話佢剋夫
蛋都冇隻 仲要返工 令老公冇面
難聽嘅冷言 美鳳敢怒不敢言
佢心諗男主外 女主内 嘅定律係咪一成不變
女人係咪生仔機器 一出世注定犯賤
背住個仔 匿係廁所 偷泣下點煙
令佢終日以淚洗面 係呢種封建觀念
你聽到了吧
刺痛你的說話
踐碎了的花
雨點 眼眶中跌下
你會振作吧
對抗冷嘲咒對罵
褪去這瘡疤 好嗎
放聲高喊吧
小分享:
依首歌係一個墨西哥女生馬雷嘅作品,由本地樂隊「血汗攻闖」改編成中文版。
相夫教子、煮飯洗衫,「血汗攻闖」喺香港嘅朋友、街坊身上睇到嘅女性處境,同馬雷所講嘅處境好相似。
無論喺墨西哥定香港,主流大眾對於女性總係有好多定形、規矩。點解女性一定要去符合呢啲標準、做人信自己有無第二啲可能性?
馬雷同「血汗攻闖」希望借音樂將依啲壓迫講出黎。
今期專題:
你是否零散工? (詳見草紙第二、三頁圖)
草根視點 